Ólögráða, einstaklingar undir 18 ára aldri, geta fengið rafræn skilríki ef forsjáraðili undirritar umsókn um rafræn skilríki fyrir viðkomandi. Tvær leiðir til undirritunar eru í boði:
A) Forsjáraðili undirritar rafrænt umsókn um skilríki fyrir ólögráða. Að því loknu getur ólögráða einstaklingurinn mætt á skráningarstöð án forsjáraðila. Athugið að ólögráða þarf að framvísa gildum skilríkjum á skráningarstöð (vegabréfi, ökuskírteini, ekki stafrænu, eða íslensku nafnskírteini).
B) Forsjáraðili og ólögráða einstaklingur mæta saman á skráningarstöð til að sækja um og undirrita rafræn skilríki fyrir ólögráða. Athugið að forsjáraðili og ólögráða þurfa að framvísa gildum skilríkjum á skráningarstöð (vegabréfi, ökuskírteini, ekki stafrænu, eða íslensku nafnskírteini).
Ef leið A er valin þarf forsjáraðili að undirrita umsóknina rafrænt áður en ólögráða mætir á skráningarstöð. Svona gengur ferlið fyrir sig:
- Forsjáraðili fer á Mínar síður Auðkennis og skráir sig inn með rafrænum skilríkjum.
- Smellir á hnappinn Sækja um skilríki fyrir ólögráða.
- Kennitala ólögráða einstaklingsins er slegin inn, svo smellt á hnappinn Skrá upplýsingar.
- Umsóknin er nú útbúin. Þegar forsjáraðili hefur lesið yfir skjalið er smellt á hnappinn Undirrita rafrænt.
Ef forsjáraðili vill eiga afrit af skjalinu er hægt að hala því niður með því að smella á táknið í valstikunni fyrir ofan skjalið. - Nú þarf forsjáraðili að auðkenna sig með rafrænum skilríkjum til að ganga úr skugga um að sama kennitala sé skráð á umsóknina.
Athugið að skjalið er nú falið og læst þar til kemur að undirritun. - Ef auðkenning er samþykkt er skjalið birt á ný og umsækjanda boðið að undirrita.
- Þegar undirritun er lokið birtast skilaboð um að nú hafi ólögráða einstaklingurinn 30 daga til að mæta á næstu skráningarstöð til að fá rafræn skilríki.
