Skilríki í farsíma

HVAÐ ERU RAFRÆN SKILRÍKI Í FARSÍMA / HVERNIG VIRKA ÞAU?

Skilríkin eru vistuð á SIM-korti viðkomandi farsíma og þú velur þér PIN-númer til þess að beita þeim. Skilríkin virka á gömlum sem nýjum farsímum, óháð stýrikerfum. Enginn kortalesari, enginn hugbúnaður, engin öpp. Bara að hafa farsímann við höndina, það er það eina sem þarf.

HVERNIG NOTA ÉG RAFRÆN SKILRÍKI Í FARSÍMA?

Þú ferð einfaldlega inn á vefsvæði þjónustuaðila, velur að skrá þig inn með rafrænum skilríkjum á farsíma og slærð inn farsímanúmer þitt. Þá birtist sjálfkrafa skjámynd á farsímanum þínum þar sem þú slærð inn það PIN-númer sem þú valdir þér þegar skilríkin voru virkjuð og þú ert komin/n inn. Ef rangt PIN-númer er slegið inn oftar en 4x læsast skilríkin og í sumum tilfellum afturkallast þau. Í báðum tilfellum eru skilríkin ónothæf og þarf að fara á skráningastöð til að fá ný rafræn skilríki virkjuð í símann.

HVAR FÆ ÉG RAFRÆN SKILRÍKI Í SÍMA / HVERNIG FÆ ÉG SKILRÍKIN Í SÍMANN MINN?

Einfaldasta leiðin til þess að nálgast upplýsingar um hvernig þú færð skilríkin í símann þinn er að slá inn símanúmerið þitt hér á vefnum. 

Fleiri svör geturðu fundið í spurningum og svörum.

HVERSU LENGI ENDAST RAFRÆNU SKILRÍKIN Í FARSÍMUM?

Skilríkin eru með 5 ára gildistíma. Áður en skilríkin renna út eru send SMS skilaboð í farsímanúmer viðkomandi og látið vita að skilríkin séu að renna út. Til að endurnýja skilríkin er nóg að fara inn á mitt.audkenni.is. Ef 90 dagar eða minna er eftir af gildistíma er notendum boðið að endurnýja skilríkin. Þá er skrifað undir nýjan samning og eftir það eru komin ný skilríki á símann með 5 ára gildistíma.

GET ÉG EINHVERSTAÐAR SÉÐ YFIRLIT YFIR NOTKUN SKILRÍKJANNA?

Á mitt.audkenni.is getur þú séð alla notkun rafrænu skilríkjanna síðustu 3 mánuði og einnig hvenær skilríkin renna út.