Hvað er NFC?
Til að nota sjálfskráningu í Auðkennisappið þarftu persónuskilríki með NFC-flögu og snjallsíma sem styður NFC.
NFC (Near Field Communication) er þráðlaus tækni sem gerir meðal annars snjallsímum kleift að lesa upplýsingar úr persónuskilríkjum á öruggan hátt.
Eru persónuskilríkin þín með NFC-flögu?
Í sjálfskráningu í Auðkennisappið er aðeins hægt að nota íslensk vegabréf og íslensk nafnskírteini þar sem rafræn skilríki eru tengd við íslenska kennitölu.
Persónuskilríki sem eru með NFC-flögu eru merkt með NFC-merkinu sem sýnt er hér að neðan, á fram- eða bakhlið skilríkjanna.
NFC-flagan inniheldur tölvulæsanlegar upplýsingar úr skilríkjunum, svo sem fullt nafn, fæðingardag, kyn, ríkisfang, skilríkjanúmer og gildistíma. Hún getur einnig innihaldið lífkenni, svo sem andlitsmynd.
Styður snjallsíminn þinn NFC?
Ef þú getur til dæmis notað símann til að greiða með Apple Pay eða Google Pay styður síminn NFC.
Android-símar
Opnaðu Stillingar.
Leitaðu að NFC. Það er oft undir Tengingum, Tengdum tækjum eða sambærilegum valmyndum.
Ef NFC er í stillingunum skaltu athuga hvort kveikt sé á NFC.
iPhone
iPhone 7 og nýrri styðja NFC og yfirleitt þarf ekki að virkja NFC sérstaklega í stillingum.
Aðrir snjallsímar
Flestir nýrri Android-símar styðja NFC, en það fer eftir framleiðanda og gerð símans.
Þú getur athugað hvort síminn styður NFC í stillingum símans eða á vef framleiðandans.
Eldri símar og farsímar sem eru ekki snjallsímar
Eldri símar og farsímar sem ekki eru snjallsímar styðja yfirleitt ekki NFC og er því ekki hægt að nota þá til sjálfskráningar í Auðkennisappið.
Ef snjallsíminn þinn styður ekki NFC getur þú ekki notað sjálfskráningu. Þú getur hins vegar mætt á skráningarstöð og fengið rafræn skilríki í Auðkennisappið.